Après Lhèida, Rodés, Vielha, La Sèu d’Urgèl, Ostana, Paisana e Cassà de la Selva, la 5a edicion de la Mòstra de Cinèma Occitan, “Llanterna Digital”, arriba a Tolosa.

Deman, dimars 18 de setembre, a 18h, lo Centre Cultural Alban Minville aculhirà la dobertura en preséncia de la directritz generala de la Politica Lingüistica de la Generalitat de Catalonha, Yvonne Griley, de l’adjonch al cònsol de Tolosa, Jean-Charles Valadier, e del president de Convergéncia Occitana, Joan-Francés Laffont.
 
Lo festenal contunharà los sers de dimècres e dijòus, los 19 e 20 de setembre, a l’Ostal d’Occitània. L’entrada es liura e gratuita.
 
La Mòstra de Cinèma Occitan, “Llanterna Digital”, promoguda pel govèrn de Catalonha, nais dels prèmis de cortmetratges que ne pòrtan lo nom e vòl èsser un veïcul de difusion de la lenga occitana a travèrs de creacions cinematograficas.
 
L’edicion d’ongan ofrís una programacion divèrsa, tant per l’origina de las òbras que s’i projectaràn, coma per la tipologia dels genres, dels estils e de las tecnicas expressivas: de longmetratges que partejan l’ecran amb de cortmetratges, de ficcion amb de documentaris, e d’umor amb de vulgarizacion etnografica. 
 
Per çò qu’es de la lenga, la Mòstra vòl èsser una veirina de las varietats de l’occitan, del gascon al vivaroalpenc, del lengadocian al lemosin o del provençal a l’auvernhat. Totas son de formas d’expression pròprias dels divèrses territòris occitans e de las personas que las parlan. 
 
Amb la volontat de venir una fenèstra d’ont se pòt aver una vision panoramica de la lenga e la cultura occitanas, per mejan de creacions audiovisualas, la Mòstra 2012 comença uèi la siá tornada que passarà per mai d’onze endreches, fins a la fin de l’annada. La Direccion Generala de la Politica Lingüistica del Departament de la Cultura de la Generalitat de Catalonha organiza aquela edicion amb la collaboracion d’institucions e d’entrepresas catalanas e occitanas que ne garentisson la preséncia en territòri occitan e catalan.
 
 
La mòstra contunharà a Montalban (Bas Carcin) los 18 e 19 d’octòbre, a Besièrs lo 25 d’octòbre e lo 8 de novembre, e fin finala a Barcelona (Païses Catalans) los 8 e 13 de novembre.
 
Los filmes son emeses amb de sostítols en catalan o en francés, segon l’endrech.